فاكر أيام أمل وعمر، ونشيد ساعي البريد زمن جميل باعترف ان احنا اتعلمنا فيه كويس حتى لو كنا بنتخض دلوقتي لما نشوف مناهج ولادنا ونقول الزمن اتغير
حقيقي الزمن اتغير كتيرواتطور في حجات كتير للأفضل وولادنا بقى لازم يواكبوا التطور ده، ومن الاتجاهات الحلوة اوي في التعليم دلوقتي حاجة إسمها التعليم من خلال الترفيه أو التعليم الترفيهي
Edutainment
يعني المزج بين التعليم والترفيه عشان يخلي التعليم ممتع وجذاب اكتر للطلبة والاطفال، الطريقة دي في التعليم انتشرت على نطاق واسع وبقت مناهج للتدريس او انشطة او العاب وهدفها تعليم الأطفال بشكل ترفيهي ممتع
والكلام ده ابتدى يطبق فعلا في المدارس ومهم كمان تطبقه في البيت مع ولادك خصوصاً في فترات الأجازات الطويلة اللي ممكن تخليه يبعد عن المذاكرة وميبقاش عايز غير اللعب
تقدرتخليه يلعب ويستثمر وقته في حاجة مفيدة تخليه ينمي مهارات كتير عنده وكمان خبرات
تعليمية أفضل ودرجة تفاعل عاليه واكيد فرص الاستكشاف والإبداع بتزيد عنده
وواحدةمن أهم تطبيقات التعليم الترفيهي إن ما كامنتش أهمهم: هي القصص اللي تقدر تعلم بيها أولادك بشكل مختلف وتخليه يتفاعل أكتر مع الموضوع اللي عايز توصلهوله
ولما نحب نعلم ولادنا تاريخهم ونعرفهم بآثار بلدهم وننمي الانتماء عندهم، فمش حنلاقي امتع من احنا نحكيلهم ونعلمهم كل ده في قصص صغيرة تربطهم بسحر وعجائب الآثار التاريخية
تعالى اقولك بقى ايه اهم 10 فوايد لصياغة التاريخ والآثار في شكل قصص للأطفال
مستنيه رأيكوا في التعليقات
وخليك متابعنا لسه في كتيير
MonumentoR - Mona Rahmo
أولاً: زيادة الإحساس بالإنتماء
هو إبنك بيحب بلده؟ بينبهر بيها زي انبهاره بدول العالم المتقدمة؟ طب شايفها إزاي؟
عمرك فكرت في الأسئلة دي؟ فكرت قبل كده تنمي إحساس الإنتماء عند إبنك أو بنتك؟
...طب فاكروإنت بتعلم إبنك الكلام
إيه أول حرف نطقه ؟ إيه أول كلمة قالها؟
...ماما؟ بابا ؟
... وبعد كده إبتديت تعلمه يعبر عن إحتياجاته، إزاي يقول إنه عايز ياكل أو يشرب أو ينام
... وبعدين علمته اسماء الأشخاص المحيطه بيه أخواته،جده، جدته
... وبعدين الأماكن اللي بيروحها النادي، الحضانة
طب قولتله وعرفته هو عايش فين؟؟ أكيد مش قصدي عنوان البيت فهمته يعني إيه بلد... وطن... أرض ؟ يعني إيه مصر؟
،ولاغالباً بتسيب المعلومة دي يتعرف عليها بالصدفة في المدرسة أو من التليفزيون وكأنها معلومة دراسية ومنهج محتاج يعرفه ويذاكره وخلاص.
. اللي انت متعرفهوش إن إنتماءه لوطنه حيخليه منتمي ليك وللعيله والبيت
معرفته لبلده حتقويه وتزود ثقته في نفسه وخصوصا لو البلد دي مصر... فخر أي حد بينتمي ليها
خد بالك الانتماء بيقوي قدرتنا على الاحساس بالاستقرار وبيشجعنا على البناء والعطاء، يعني كل ما حتحب بلدك كل ما حتخليها أحسن مكان في الدنيا
ثانياً: التغلب على صعوبة دراسة التاريخ
إبنك أو بنتك يعرفوا إيه عن الآثار الموجودةفي مصر؟ أو في أي مكان تاني؟
طب ممكن تشده أو يبقى عنده فضول تجاهها؟
طب يا ترى بيحب التاريخ ولا بيعتبره ممل؟
كتير مننا زمان كان بيحس إن دراسة التاريخ صعبة ومملة وفيها تفاصيل وأحداث وتواريخ كتير بس كنا بنحب فيلم وا إسلاماه وصلاح الدين الأيوبي عشان بتشدنا الحدوته
ولأن الطفل بيحب دايماً الحاجات المميزة واللي فيها إثارة وتشويق كان لازم نبعد عن دماغه فكرة الملل وطريقة السرد التقليدية وإحنا بنحكيله عن بلده وآثارها.
. خليك مؤمن دايماً إن أطفالنا ليهم الحق في معرفة تاريخهم والاستمتاع بدراسته
ثالثاً: إكتساب مهارات التقكير الإبداعي
إزاي أخلي إبني يكتسب مهارات التفكير الإبداعي؟
. القراءة ورواية القصص بتقوي نمو العقل عند الأطفال وبتزود خيالهم اللي بيعتبر بداية الابتكار والابداع لانه بيخاطب جواه الفضول
. ده غير إنها كمان بتساعد على تطوير اللغة والتعبير عن المشاعر
. القصص كمان بتشجعهم على الاستكشاف، وطرح الأسئلة اللي بتقوي لغة الحوار عنده
.حاول تحبب ولادك في قراءة القصص أو إقرأ معاهم أو حتى إحكيلهم حواديت، صدقني حتفرق كتير معاه
رابعاً:تنمية قوة الملاحظة
دماغ ابنك/ بنتك فيها ايه؟ تعرف تجاوب على السؤال ده؟
.حتقولي اصحابه واللعب والموبايل والفيس بوك والانستجرام والواجب والتمرين وبرطمان النوتيلا اللي في التلاجة واخوه اللي بيرخم عليه واسرح شعري ازاي (للبنات).
.حقولك للأسف لأ، انت متعرفش ابنك بيتعرض لأيه وايه اللي مالي دماغه
دماغ ابنك زي دماغك بالضبط فيها كل الحجات اللي فوق دي ومعاها زحمة ودوشة كتييير، فيها كل الأحداث اللي بتدور حواليه، ويمكن دي اخطر مشاكل التكنولوجيا، فيها بلاد بتحارب بعض وفيها مظاهرات وفيها ارهاب وفيها ناس بتموت بعض وناس بتتخانق على السوشيال ميديا، فيها مهرجانات وحفلات، وفيها مشاكلك في الشغل اللي
بتخليك راجع مكشر، وفيها خناقتك وانتي سايقة لما حد كسر عليكي، والدوشة والشارع والكلكسات وحتى فاتورة الكهرباء اللي بتضايقك ... وحجات كتير اكتر مما تتخيل فوق مستوى وعيه وادراكه
وبسبب لدوشة دي كتير من أطفالنا بيواجهوا صعوبة في الانتباه في الفصل والتركيز عموماً في مرحلة ما من حياتهم الدراسية، يمكن بنتخيل إن عندهم مشكلة في التعليم او التحصيل، لكن غالباً ده بيبقى ناتج من كثرة التشتيت
. تعرف بقى أن القصص تقدر تجذب انتباهه بشكل أفضل من أي معلومات تانية لأنها ببساطة بتسيب أثر عاطفي عليه وده بيساعده على تنمية الملاحظة عنده بصورة كبيرة
. يمكن مع اختلاف زمنك عن زمنهم متعرفش تفضيله الدوشة دي بس تقدر تروقها شويه، تقدر تنمي عقله وتنمي احتياجه للبحث والاستطلاع عشان يبقى إنسان متزن
وانت ماشي مع ابنك او راكبين عربية متخليهوش يمسك الموبايل خليه يبص من الشباك على المباني اللي حواليه الفت نظره إن كل مبنى ليه شكل وليه وظيفة
...واختلافه باختلاف تفاصيله، ده بيت فيه ابواب وشبابيك وبلكونات وده مول شبابيكه ازاز عشان نشوف اللي جواه
.واكثر مباني حيلاقي فيها تفاصيل هي المباني القديمة والآثاروهنا تيجي أهمية انهم يحبوها ويتعلقوا بيها ويعيشوا كل تفصيلة فيها عشان يبقوا مبدعين وفنانين زي أجدادنا
خامساً: تقليل وقت إستخدام الشاشات
ابني علطول باصص في الموبايل بنتي مبتتحركش من قدام التابلت
! نفسى اشغل وقتهم بحاجة مفيدة
عارف ان كل الدراسات أكدت خطورة الشاشات دي على الأطفال وخصوصاً لو بوقت أطول من المفروض وتم ربط طول الوقت أمام الشاشات والتعرض المنتظم ليها بمشاكل كتير أشهرها
.. البدانة، قلة التركيزو مشاكل الانتباه، نوم غير كافي، مشاكل في السلوك، التأخير في تنمية المهارات اللغوية والاجتماعية، العنف وغيرها كتير للأسف
. الوقت ده للأسف بيعتبر وقت مستقطع من حياتهم بيفصلوا فيه عن كل اللي حواليهم وكل ما المدة طالت كل ما تركيزه قل وزاد معاها رغبته بانه يبقى هو وموبايله وبس
.وبما أن القصص تعتبر أفضل نشاط بديل لا يتطلب وقتًا أمام الشاشات يبقى الحل ده يستاهل إنك تجربه وتخليه أولوية في حياتك مع إبنك بالتدريج
سادساً: زيادة الترابط الأسري
... ايه ده؟، ليه؟، يعني ايه؟، إزاي؟،.... ابنك بيسألك كام سؤال في اليوم؟، طب انت بترد عليهم كلهم؟ وبترد تقوله أيه؟
. الأسئلة الكثيرة اللي طفلك بيسألهالك على مداراليوم هي الطريقة اللي بيعبر بيها عن الأفكار اللي في دماغه أو الحجات اللي بيشوفها أو يسمعها
.الأسئلة دي مهما كانت بسيطة فهي بالنسباله وسيلة الحصول على المعلومات واشباع فضوله للمعرفة عشان يعرف ويفهم العالم اللي حواليه
حاول تظهر إهتمامك وتجاوبه وتديله المعلومات بالقدر اللي يناسب فهمه وإدراكه وممكن تساعده في اكتشاف الإجابة بنفسه. خليه يعبر عن نفسه بالعكس لو هو مسألكش، إسأله انت وافتح معاه حوار وادخل جوه دماغه وخليك صبور شويه
.وجودالقصص في حياتك مع أولادك حتساعدك بطريقة مميزه ، لأنها ممكن تزود الترابط الأسري عن طريق المناقشة وطرح الأسئلة
سابعاً: زيادة التركيز وتقوية الذاكرة
!! خدت إيه النهاردة في المدرسة؟ مش فاكر! حطيت شنطتك فين؟ مش عارف!!
!! كام مرة سألناهم أسئلة زي دي، وكانت الإجابات محبطة بالشكل ده
.زي ما الدوشة اللي في دماغ ولادنا، اللي إتكلمنا عليها قبل كده، بتأثر على قوة ملاحظته كمان بتضعف ذاكرته بشكل كبير
.القراءة لطفلك بصوت عالى حتساعده على تنمية ذاكرته، تكرار القصص للأطفال بتخليه يتعلم القصة، وبعد كده يبدأ يحكيها فتنمي ذاكرته
تخيل بقى لو القصص دي قصص حقيقية ومربوطة بالواقع بشكل درس أو حكمه أو رسالة تربوية، أكيد حيركز فيها أكتر وحتنمي عنده قوة الذاكرة، وخصوصاً لو القصص دي مصورة، لأن الصور ليها مفعول السحر في ثبات أي معلومة لأنها بترتبط بذاكرته البصرية وبتخليه يفهم المعلومات بشكل بسيط وسلس
ثامناً: الإستمتاع بالتاريخ
ابني بيحب ايه؟ تعرف تجاوب على السؤال ده؟
ابنك/ بنتك بيحبوا حجات كتير أوي يمكن متعرفهاش كلها أو حتى يمكن متعرفش أي حاجة منها
إحنا كبالغين وآباء وأمهات تحديداً بنعتقد أننا نعرف كل حاجة، وخصوصاً لما الموضوع يتعلق بأولادنا، نبتدي من غير قصد في الأوامر والتنبيهات والمواعظ غير
المرغوب فيها بالنسبة لأولادك بالعكس ممكن يكون محتاجك تشاركه في أفكاره وتكلمه بلغته
أحيانا بنكون محتاجين نعود نفسنا إزاي نحول انتباهنا للحجات اللي ولادنا بيحبوها أكتر من اللي إحنا عايزن نخليهم يحبوها
محتاجين نبطىء رتم حياتنا السريعة ونركز في المعنى الحقيقي للسعادة في الحياة، اللي حتى أفضل الكتب مش حتعلمهلنا لكن ممكن نص ساعة مع ولادنا تفرق كتير، سعادتهم حتغمرك بأنقى حب في العالم
وزي ما قولنا إن الأطفال بيميلوا دايماً للتجديد، فممكن ببساطة تجرب تخليهم يستمتعوا بالآثاروالتاريخ
اديهم فرصة يعيشوا ويستمتعوا بالماضي ويتعلموا من تاريخ البشرية، لأن مهما إختلفت تجربتنا المعيشية عن تجربة أسلافنا أكيد حتلاقي تشابه في أهدافنا وقيمنا.
محتاج تعرف أولادك إن مش مهم بس اننا نتعلم من أجدادنا لكن نفتكر دايماً ونحترم ونمتن لـ كل اللي عملوه عشانا بإننا نديهم حقهم ونحاول يبقى لينا اثر زيهم في الحياه للي حيجوا بعدنا
تاسعاً: تقوية التفكير التصميمي
إزاي نعلم أطفالنا التفكير خارج الصندوق؟
التفكير التصميمي هوعملية لحل المشكلات بطريقة إبداعية. بيطرح الأسئلة، ويخلق حلولًا مبتكرة ، ويختبر ،ويجرب ، ... بمجرد أن تصبح مشكلة ، فأكيد في فرصة لحلها
الهندسة المعمارية ممكن تشجع الطفل على الشعور بإحساسه بالاستثمار في مكانه، وبتأسس إحساسه بالانتماء للمكان والمجتمع وبتلهمه للإبتكار لجعل العالم مكانًا أفضل
محتاج يشوف المباني القديمة والجديدة بنظرة مختلفة، ليه اتبنوا كده، وازاي، وايه المشكلة اللي المبنى ده حلها، او حتى محلهاش، وسع نظرته وكبر آفاق تفكيره
محتاجين نساعد أطفالنا على إدراك بيئتهم المبنية ونننمي قوة ملاحطتهم
العمارة والتصميم في كل مكان حولنا ، في الواقع ، كل شيء لم تصنعه الطبيعة الأم تم تصوره وتصميمه ورسمه بواسطة ... شخص. المفهوم ده حيفتح عقول الأطفال للنظر إلى محيطهم من منظور جديد
ومفيش أجمل من العمارة القديمة والآثار وتفاصيلها ممكن يتعلم منها
قصص الآثار القديمة بتولد أسئلة تؤدي إلى الخيال والكثير من الأفكار المبتكرة
عاشراً: تنمية الإحتياج للبحث والإستطلاع
ايه ده؟، ليه؟، يعني ايه؟، إزاي؟،.... ابنك بيسألك كام سؤال فياليوم؟، طب انت بترد عليهم كلهم؟ وبترد تقوله أيه؟
تعالى نكمل كلامنا عن تطوير ثقة ابنك في نفسه وتحفيزهعلى التعلم
الأسئلة الكثيرة اللي طفلك بيسألهالك على مداراليوم هي الطريقة اللي بيعبر بيها عن الأفكار اللي في دماغه أو الحجات اللي بيشوفها أو يسمعها
الأسئلة دي مهما كانت بسيطة فهي بالنسباله وسيلة الحصول على المعلومات واشباع فضوله للمعرفة عشان يعرف ويفهم العالم الليىحواليه (زي جوجل بالنسبالك كده). تخيل كده وانت بتعمل بحث عن اي معلومه يرد عليك جوجل: لا والله انا مش فاضيلك دلوقتي
لازم تحاول تظهر إهتمامك وتجاوبه وتديله المعلومات بالقدر اللي يناسب فهمه وإدراكه وممكن تساعده في اكتشاف الإجابة بنفسه
خليه يعبر عن نفسه بالعكس لو هو مسألكش، إسأله انت وافتح معاه حوار وادخل جوه دماغه وخليك صبور شويه
ورواية القصص لأطفالك حتسهله الوصول لتجارب مختلفة وتوسع فهمه للعالم من حوليه وتزود احتياجه للبحث وحتشجعه على الاستطلاع
ودي كانت اهم 10 فوايد لصياغة التاريخ والآثار في شكل قصص للأطفال
وده اللي بنساعدك تعمله في
MonumentoR
ده لإننا فكرنا إزاي نعلم ولادنا تاريخهم ونعرفهم بآثار بلدهم وننمي الانتماء عندهم
فملقناش امتع من اننا نحكيلهم ونعلمهم كل ده في قصص صغيرة تربطهم بسحر وعجائب الآثار التاريخية
قولنا بتعمل ده مع ولادك؟ وإزاي؟
مستنيه رأيكوا في التعليقات
وخليك متابعنا لسه في كتيير
MonumentoR - Mona Rahmo